အောက်တိုဘာ၊ ၆
ကချင်ပြည်နယ်၊ တနိုင်းမြို့နယ်၊ ကောင်ရာကျေးရွာအဝင်မှာ အကြမ်းဖက်စစ်ကောင်စီရဲ့ ယာဉ်တန်းတွေကို လုံခြုံရေး ယူပေးတဲ့အဖွဲ့နဲ့ ကချင်လွတ်လပ်ရေး တပ်မတော် (KIA)တို့ တိုက်ပွဲ ဖြစ်ပွားခဲ့တယ်လို့ အနီးအနားမှာရှိတဲ့ ဒေသခံတစ်ဦးဆီကနေ သိရပါတယ်။
တိုက်ပွဲဲမှာ ဒီကနေ့ အောက်တိုဘာလ (၆) ရက်နေ့ နံနက် (၆) နာရီချိန်တည်းက စတင်ဖြစ်ပွားခဲ့ပြီးတော့ (၁၀) နာရီချိန်လောက်ထိ နှစ်ဖက်တပ်ကြား အပြန်အလှန် ပစ်ခတ်တိုက်ခိုက်ခဲ့တယ်လို့ ဒေသခံက ဆိုပါတယ်။
” လုံခြုံရေး ယူတဲ့အဖွဲ့နဲ့ ဒီမနက် (၆) နာရီတည်းက ဖြစ်တာ။ (၁၀) နာရီလောက်ထိပေါ့။ ထိခိုက်သေဆုံးမှုနဲ့ ပက်သက်ပြီးတော့ ဘာမှ မသိရဘူး။” လို့ ဒေသခံက ဆိုပါတယ်။
မနေ့က အောက်တိုဘာလ (၅) ရက်နေ့ ည (၇) နာရီလောက်ကလည်း တနိုင်းမြို့ကနေ ပြန်ခေါက်ခဲ့တဲ့ အကြမ်းဖက်စစ်ကောင်စီရဲ့ စစ်ကား (၃၈) စီးကို ဂျန်ပူဘွမ်မှာ KIA ဘက်ကနေ မိုင်းဆွဲတိုက်ခိုက်ခဲ့တဲ့အချိန် ကားတစ်စီး ပျက်စီးခဲ့တယ်လို့ ဒေသခံက ဆိုပါတယ်။
လက်ရှိချိန် အကြမ်းဖက်စစ်ကောင်စီရဲ့ ယာဉ်တန်းတွေ ရှဒူးဇွပ်တပ်စခန်းမှာ ရောက်ရှိနေတယ်လို့လည်း သိရပါတယ်။ရှဒူးဇွပ်ကျေးရွာမှာ ရောက်ရှိနေတဲ့ စစ်ယာဥ်တန်းတွေ ထွက်ခွာရင် တိုက်ပွဲ ဖြစ်လာနိုင်ခြေရှိတာကြောင့် ဒေသခံတွေ စိုးရိမ်နေကြပါတယ်။
ပြီးခဲ့တဲ့ အောက်တိုဘာလ (၄) ရက်နေ့မှာလည်း ကောင်ရာကျေးရွာက အကြမ်းဖက်စစ်ကောင်စီတွေရဲ့ ယာဥ်တန်း လုံခြုံရေးယူပေးတဲ့အဖွဲ့တွေကို ကချင်လွတ်လပ်ရေးတပ်မတော် (KIA) ကနေပြီးတော့ မိုင်းဆွဲ တိုက်ခိုက်ခဲ့ပါတယ်။